Nagkasabot ang House Prosecution Panel ug ang Defense Panel sa pagdawat sa pipila ka common exhibits atol sa pagpadayon sa impeachment trial batok kang Vice President Sara Duterte niadtong Lunes, Agosto 3. Ang kasabutan nagpasabot nga ang mga ebidensiyang gidawat sa duha ka panig dili na kinahanglan pang pamatud-an sa korte. Gisugdan kini pinaagi sa hangyo ni House Prosecution counsel Atty. Lorna Kapunan, samtang mihangyo usab og mubo nga suspensiyon si Defense counsel Atty. Michael Poa aron masusi ang hangyo.
Sa pagpadayon sa pagdungog, misugot ang depensa sa pagdawat sa kadaghanan sa mga dokumentaryong ebidensiya sa prosekusyon, apan ilang gisupak ang 845 ka acknowledgment receipts nga may kalabotan sa panahon gikan Disyembre 21 hangtod 31, 2022. Wala usab nila dawata ang usa ka proposed stipulation nga nag-ingon nga ang Office of the Vice President nakadawat og ₱125 milyon nga confidential funds niadtong Disyembre 20, 2022 ug nahurot kini sulod lamang sa 11 ka adlaw.
Lakip sa mga gidawat sa depensa ang mga stipulation nga ang Department of Education nakadawat og ₱37.5 milyon nga confidential funds matag quarter, samtang ang Office of the Vice President nakadawat og ₱125 milyon alang sa Disyembre 2022. Gidawat usab nila nga ang mga liquidation documents sa OVP ug DepEd pirmado sa mga awtorisadong opisyal.
Gipasalamatan ni Atty. Kapunan ang depensa sa ilang kooperasyon, samtang si Senate Impeachment Court Presiding Officer Francis “Chiz” Escudero mipasidungog sa duha ka panig tungod sa pagpasayon sa proseso sa paglitis. Matod pa ni Kapunan, mikunhod og 10 ka kahon sa ebidensiya ang kinahanglan pang hisgutan sa korte.
Photo courtesy: Senate of the Philippines
