Aktibong naghatag og suporta ang City Mental Health Board sa mga estudyanteng adunay mga kabalaka sa pangisip. Kini ang gipasiugda ni Konsehal Paolo Nicolo Gaane atol sa regular nga sesyon sa Konseho isip tubag sa mga insidente sa hulga nga naglambigit sa mga estudyante nga nakapabalaka sa komunidad.
Matod ni Gaane, ang City Mental Health Board nagtinabangay pag-ayo sa mga eskwelahan pinaagi sa City Social Welfare and Development (CSWD) aron masiguro nga ang mga estudyante nga nanginahanglan og tabang makadawat dayon og hustong serbisyo. Gipasabot usab niya nga ang uban nanginahanglan og medikal nga pag-atiman gikan sa mga health professionals, samtang ang uban mas angay sa counseling, therapy, ug psychosocial interventions.
Dugang pa niya, ang Psychosocial Division sa CSWD padayon nga nagresponde sa mga estudyante ug ilang mga pamilya, ug naghatag usab og hotline numbers alang sa mga espesyal nga serbisyo kon gikinahanglan. Gipunting niya nga importante ang sayong pagtabang aron malikayan ang paglala sa kahimtang sa mga kabatan-onan.
Gidayeg usab ni Konsehal Gaane ang inisyatiba ni Konsehal Jonjon Rodriguez sa pag-establisar og Barangay Mental Health Desk, nga magdala sa mental health services nga mas duol sa matag komunidad. Gipasiugda niya nga nagpadayon ang siyudad sa pagpalig-on sa mga programa aron masiguro nga ang tanang nanginahanglan og tabang sa mental health makadawat og tukmang suporta.
Photo courtesy: Cagayan de Oro City Council
