Gipahimangnoan sa Barangay Council sa Barangay Lapasan ang tanang ginikanan nga magpabiling mabinantayon sa ilang mga anak, kasunod sa nagkakusog nga mga hulga sa pagpamusil sa mga eskwelahan sa Dakbayan sa Cagayan de Oro.
Matud ni Barangay Captain Julito Ogsimer, dili angayng balewalaon ang mga hulga tungod kay mahimong maangin ang kaluwasan ug kinabuhi sa mga estudyante nga naningkamot alang sa pagpanday sa ilang kaugmaon.
Ang pahimangno gipagawas human gisuspenso kagahapon ang klase sa Lapasan National High School, dihang mikatag sa social media ang usa ka hulga sa pagpamusil nga may kalabotan sa mga eskwelahan sa syudad nga nag punting sa grade 7 ug grade 12.
Nag-awhag usab ang barangay sa publiko nga magtinabangay ug dayong ireport sa mga awtoridad ang bisan unsang impormasyon nga mahimong makatabang sa pagpanalipod sa mga kabatan-onan.
Sa pikas bahin, giklaro ni Janboy Actub, tigpamaba ni Mayor Rolando “Klarex” Uy, nga precautionary measure lamang ang pagsuspenso sa klase sa Barangay Lapasan human sa nadawat nga hulga.
Matud ni Actub, dako ang posibilidad nga wala pa mapamatud-i ang threat, apan nagpadayon pa ang imbestigasyon sa Philippine National Police aron masuta ang kamatuoran niini.
Bisan pa niini, gipasidaan ang publiko nga dili angay magkumpyansa ug kinahanglan magmatngon sa tanang higayon. Giawhag usab ang mga netizen nga gamiton ang social media sa responsableng paagi ug likayan ang pagsabwag og mga impormasyon nga mahimong hinungdan sa kahadlok ug kagubot sa komunidad.
