Patay ang labing menos siyam ka mga indibidwal ug naangol usab ang kapin 30 pa, human sa pag-atake sa Russia sa kapital sa Ukraine nga Kyiv gamit ang mga drone ug ballistic missiles niadtong miaging gabii.
Gikataho sa mga opisyal nga daghang bilding ug sakyanan ang nadaot sa nagkadaiyang distrito sa siyudad, lakip ang Embassy of Lithuania human sa maong pag-atake.
Matod pa ni Ukrainian President Volodymyr Zelensky, 27 ka ballistic missiles ang gipabuto sa maong pag-atake apan usa lamang ang giingong na-intercept sa Ukrainian forces.
Tungod niini, iyang gipasiugda pag-usab ang panginahanglan sa Ukraine og dugang air-defense systems, ilabina ang US-made Patriot missile interceptors nga epektibo batok sa ballistic missiles.
Nasayran nga gipakusgan sa Russia ang paggamit sa mga hinagiban sukad pa niadtong Hunyo, diin miresulta sa pagkamatay sa daghang mga sibilyan sa Ukraine.
Photo Courtesy: MPR News
