Gisalikway sa Sandiganbayan Second Division ang hangyo sa prosekusyon nga kuhaon si kanhi DPWH Secretary Manuel Bonoan isip co-accused sa kasong graft nga gikalambigitan ni Senador Jinggoy Estrada labot sa anomalya sa flood control projects.
Sumala sa korte, dili na pwedeng bag-uhon ang impormasyon sa kaso tungod kay na-arraign na si Estrada niadtong Hunyo 4. Ang pagtangtang kang Bonoan makamugna og dakong kausaban sa teorya sa kaso gikan sa conspiracy ngadto sa individual liability, diin makaapektar kini sa depensa sa senador.
Tuyo unta sa prosekusyon nga kuhaon si Bonoan sa kaso aron magamit kini isip state witness sa mga anomalya sa flood control, lakip na ang master case batok kang kanhi House Speaker Martin Romualdez. Apan gi-insistar sa Sandiganbayan nga dili gitugotan ang maong pagbag-o sa pamaagi niining yugtoa sa pagtaral.
Bisan pa man niini, giklaro sa korte nga posible gihapon nga ma-discharge si Bonoan pinaagi sa saktong legal nga proseso sa umaabot, samtang padayon gihapon siyang magpabilin nga co-accused sa kaso ni Estrada sa pagkakaron
Photo Courtesy: Sandiganbayan/Wikimedia common
