Naaresto ang duha ka suspek ug na-rekober ang usa ka silver metallic Toyota Hilux pickup human sa gikatuhang carnapping nga nahitabo sa Azura Subdivision, Barangay Casisang, Malaybalay City sa hapon sa Agosto 2, 2026.
Sumala sa imbestigasyon, giparking sa tag-iya ang iyang sakyanan sa atubangan sa balay sa iyang pag-umangkon. Pipila ka minuto ang milabay, iyang namatikdan nga wala na ang pickup, hinungdan nga iyang gi-report dayon ang insidente sa Malaybalay City Police Station.
Human madawat ang report, nagpagawas ang kapulisan og flash alarm aron mapahibalo ang ubang police units ug mga checkpoint sa maong sakyanan.
Makalabay ang pipila ka minuto, nasakpan sa checkpoint sa Quezon Municipal Police Station ang maong Toyota Hilux. Tungod niini, naaresto ang duha ka suspek nga giila lamang sa ilang mga alyas nga “Bon” ug “Fred.”
Padayon pa ang operasyon sa mga awtoridad batok sa usa pa ka gikatuhang kauban sa mga nadakpan nga hangtod karon wala pa masikop. Ang duha ka naarestong suspek ug ang narekober nga sakyanan anaa karon sa kustodiya sa Malaybalay City Police Station samtang giandam ang angayng mga kaso nga ipasaka batok kanila
Photo Courtesy:PCADG Northern Mindanao
