Naaksidente ang usa ka truck nga nagkarga og dul-an 200 ka heads sa baboy nga propedad sa Farm Crest Ventures tungod sa kadanlog sa karsada sa Barangay Patpat, Malaybalay City buntag kagahapon Agosto 03, 2026.
Base sa kuha sa video ni JEI PHEG nga tungod sa maong disgrasya, nagkatag ang mga baboy diin imbes nga tabangan ang driver ug crew, nagkaguliyang ang dapit human gipangkuha ug gipangbitbit sa pipila ka residente ug lumalabay ang mga nakawala nga hayop.
Naghangyo karon ang tag-iya uban ang mga lokal nga opisyal sa barangay sa tanang nakakuha nga unta ibalik—buhi man o karne na—ang mga baboy ngadto sa truck nga nag-parking duol sa spillway. Gipahinumdoman sa mga nag-apelar nga ang Farm Crest Ventures dako na og natabang sa komunidad, labi na sa mga kabataan ug tunghaan sa Barangay Patpat, busa angay lamang nga ipakita ang pagkamatinabangon ug hustong moralidad pinaagi sa pag-uli sa mga nakuha aron dili magbilin og kaulawan sa barangay.
Nagpaabot gihapon og dakong pasalamat ang tag-iya ug ang pamunuan katawhan nga nakasabot, nagpakabana, ug nitabang o nag-uli na sa ilang mga nadala.
Photo Courtesy: JEI PHEG /Barangay Patpat Council
