Gimando sa Department of Labor and Employment (DOLE) nga ang mga bata nga nag-edad ubos 15-anyos kinahanglan nga adunay Working Child Permit sa dili pa sila makaapil sa mga vlogs, livestreams, social media content, digital advertisements, web series, podcasts, ug streaming services.
Kini kabahin sa Labor Advisory No. 12, Series of 2026, nga nagtumong sa pagpalig-on sa proteksyon sa mga kabataan batok sa child labor ug pagpahimulos pinaagi sa digital platforms, subay sa Republic Act No. 9231.
Ubos sa balaod, dili tugotan ang pagtrabaho sa bata nga ubos sa 15 anyos gawas lamang kung kini ubos sa pagdumala sa ginikanan o legal guardian.
Nagpahinumdom usab ang DOLE nga dili mahimong molapas sa upat ka oras kada adlaw ug 20 ka oras kada semana ang trabaho sa bata, ug gidili ang pagtrabaho gikan alas-8 sa gabii hangtod alas-6 sa buntag aron mapanalipdan ang ilang panglawas ug edukasyon.
Ang mga ginikanan, legal guardians, ug digital employers o brands maoy adunay responsibilidad sa pagkuha sa permit sa labing duol nga opisina sa DOLE sa dili pa magsugod ang content production nga adunay malambigit nga mga kabataan.
Photo Courtesy: Utusan Malaysia
