Nagpadayon ang TESDA Zamboanga del Sur sa pagpahigayon og pre-assessment alang sa mga Senior High School students isip kabahin sa pag-andam kanila sa National Assessment ug pag-angkon sa National Certificate (NC).
Kini subay sa gibutyag ni Engr. Samad Dibansa Provincial Director sa TESDA Zamboanga del Sur atol sa pakighinabi sa Juander Radyo News Team ning bag-o. Segun ni Dibansa, pinaagi sa maong pre-assessment, masuta ang kahibalo ug kahanas sa mga estudyante sa ilang napiling Technical-Vocational-Livelihood track (TVL).
Tumong usab niini nga mailhan ang mga bahin nga kinahanglan pa nilang palig-onon sa dili pa sila moagi sa opisyal nga assessment. Sumala niya, ang maong kalihokan makatabang sa mga estudyante aron mas andam sila sa pagkuha sa National Certification, nga mahimong dugang nga kwalipikasyon sa pagpangita og trabaho o sa pagpadayon sa ilang karera human sa Senior High School.
Padayon usab ang TESDA Zamboanga del Sur sa paghatag og suporta ug mga programa aron mapalambo ang kahanas sa kabatan-onan ug maandam sila sa panginahanglan sa industriya.
