Misaka na sa 38 ang gidaghanon sa namatay human sa kusog nga magnitude 7.1 nga linog nga miigo sa Kumamoto Prefecture sa habagatang-kasadpang bahin sa Japan niaging semana.
Sumala sa state broadcaster nga NHK, 36 na ang kumpirmadong namatay, samtang duha pa ang padayon nga giimbestigahan aron matino kung direktang resulta ba kini sa linog.
Labaw sa 9,200 ka residente ang nagpabiling nagpuyo sa 210 ka evacuation centers, samtang kapin sa 3,400 ka balay ang naguba. Naa usab sa kapin 69,000 ka panimalay ug establisyemento ang wala gihapoy suplay sa tubig.
Padayon usab ang pagbangon sa mga ospital nga naapektuhan sa linog. Samtang, dul-an sa 30 ka tawo ang gidala sa ospital tungod sa gidudahang heatstroke human mosaka sa kapin 37°C ang temperatura sa ubang bahin sa Kumamoto.
Gitapos na sa mga awtoridad ang search and rescue operation sa usa ka Aeon shopping mall, diin pito ka trabahante ang namatay ug lima ang naangol sa pagbuto nga nahitabo dihang miigo ang linog.
Matod sa mga opisyal, posible pang mosaka ang gidaghanon sa mga nagubang mga bilding samtang nagpadayon ang inspeksyon sa mga apektadong lugar.
Photo Courtesy: The New York Times
