Mosulod na sa audit phase karong semanaha ang impeachment trial batok kang Bise Presidente Sara Duterte human sa gipahigayong pagpresentar sa mga testigo sa miaging semana nga nagpamatuod sa pagpagawas ug pag-withdraw sa ₱612.5 million nga confidential funds sa Office of the Vice President (OVP) ug Department of Education (DepEd).
Matud ni Tingog Party-list Rep. Jude Acidre, gikan sa pagsubay sa gigikanan ug pag-withdraw sa pondo pinaagi sa pito ka tseke gikan sa National Treasury, mobalhin na karon ang prosekusyon sa pagsusi kon giunsa paggasto ang maong dakong pondo ug kon husto ba kini nga na-liquidate.
Gipaabot nga unang motungha sa impeachment court ang mga testigo gikan sa Commission on Audit (COA) nga sila si kanhi State Auditor Roderick Wamil ug kasamtangang Intelligence and Confidential Funds Audit Office Supervising Auditor Celine May Del Campo aron ipasabot kon nasunod ba sa mga patakaran ang liquidation ug giprisentar nga mga supporting documents.
Gilauman usab nga gituki sa mga audit experts gikan sa COA ang gimando nga pagpabalik sa ₱73.287 million nga confidential funds nga gipagawas sa OVP niadtong 2022.
Photo Courtesy: Rep. Jude Acidre
