Narekober na ang patayng lawas sa 12-anyos nga batang lalaki nga si Carlo Alemanio human kini naanod sa kusog nga haguros sa tubig-baha sa Purok 6, Barangay Embayao, Don Carlos, Bukidnon.
Sumala kang Barangay Kagawad Mary Grace Gabijan, nakit-an ug narekober ang lawas sa bata pasado alas-12:00 sa udto niadtong Agosto 1, 2026 sa Muleta River, nga pipila ka kilometro ang layo gikan sa dapit diin siya nahulog ug naanod.
Nahitabo ang aksidente alas-9:00 sa buntag niadtong Hulyo 31 sa dihang natagak ang biktima gikan sa kabayo nga iyang gisakyan uban sa iyang 17-anyos nga ig-agaw. Napandol matud pa ang tiil sa maong kabayo hinungdan nga nahulog si Carlo sa kusog nga sulog sa tubig-baha, samtang naluwas hinuon ang iyang ig-agaw nga nakalangoy sa daplin ug nakatukod usab og nakalingkawas ang kabayo nga ilang gisakyan.
Dihang nahitabo ang maong insidente, nagpahigayon dayon og malapuson nga search and rescue operation ang mga otoridad ug lokal nga komunidad hangtod sa pagkarekober sa iyang patayng lawas pagkasunod adlaw. Giandam na karon sa pamilya ug sa lokal nga kagamhanan ang hapsay nga pagpahiluna sa gihigugmang bata samtang nagpadayon ang pahimangno sa publiko nga magmatngon sa panahon sa ting-ulan ug pagbaha.
Photo Courtesy: Kagawad Mary Grace Gabijan
