Gikakurat sa mga residente sa Cabanglasan, Bukidnon ang usa ka brutal nga pagpanglapa human nadiskobrehan ang usa ka kabayo nga gikuhaan og duha ka paa ug gipaanod sa Bobonawan River sa Purok 7-B, Barangay Poblacion niadtong Agosto 1, 2026 sa buntag.
Giasoy sa tag-iya sa kabayo nga si Titing Magdula, residente sa Purok 6, nga katapusan pa niyang gitigway ang iyang unom ka tuig nga binuhi sa relocation area pasado alas-6 sa gabii niadtong Hulyo 31 sa wala pa kini gikuha sa wala mailhing suspetsado.
Buntag na pagkasunod adlaw sa dihang mipahibalo ang pipila ka residente bahin sa nakit-ang patayng hayop diin nasayran nga gidala sa suspetsado ang kabayo ngadto sa daplin sa sapa aron didto lapaon ug kuhaan og duha ka paa sa wala pa gipaanod sa suba. Nasayran usab gikan sa mga lokal nga opisyal nga kini pa lamang ang unang higayon nga adunay na-report nga insidente sa pagpanglapa ug pagpamutol sa parte sa binuhing mananap sa maong lungsod.
Dihang nasayran ang maong panghitabo, gipablotter dayon ni Magdula ang insidente sa Cabanglasan Municipal Police Station nga karon nagpatuman na og lawom nga imbestigasyon. Nagpadayon ang manhunt ug intelligence gathering sa kapulisan aron mailhan, madakpan, ug mapasakaan og haom nga kaso.
Photo Courtesy: Titing Magdula/ Cabanglasan MPS
