Gipasalig sa Philippine Drug Enforcement Agency (PDEA) Bukidnon nga intelligence-based ang tanan nilang anti-illegal drug operations ug walay kamatuoran ang mga alegasyon bahin sa random nga pagdakop o “planting of evidence.” Sumala kang Rodolfo Dela Cerna Jr., Investigation Agent III ug Provincial Officer sa PDEA Bukidnon, adunay klarong target ang matag operasyon ug moagi pa kini sa subsob nga pre-operation validation sa regional office sa dili pa opisyal nga ipatuman.
Gipasabot ni Dela Cerna nga nakabutang na daan sa operational plan ang mga ngalan, lokasyon, ug uban pang importanteng detalye sa target, busa imposibleng modakop ang mga operatiba og tawo nga walay kalabutan sa iligal nga aktibidad. Gibutyag usab niya nga adunay mga operasyon nga magpabiling negatibo kon walay mahitabong drug transaction, diin walay mahitabong pagdakop bisan pa man og moabot sa kaadlawon ang ilang pagbantay ug pagpuyo sa area.
Tungod niini, gimandoan sa opisyal ang publiko nga dili basta-basta motuo sa mga hungihong nga adunay pagpananom og ebidensya gikan sa mga sakop sa kapulisan ug PDEA. Gipasiugda sa ahensya nga ang PDEA nagasunod gayud sa hustong legal nga proseso, balaod, ug lagda sa matag operasyon aron mapanalipdan ang katungod sa matag usa ug masiguro ang kaangayan batok sa iligal nga droga
Photo Courtesy:PDEA
