Gipasiugdahan ang Mass Casualty Incident (MCI) Drill sa City Disaster Risk Reduction and Management Office (CDRRMO) sa New City Hall Grounds, Casisang, Malaybalay City, Bukidnon niadtong nakalabay nga adlaw.
Kabahin ang maong operasyon sa pagsaulog sa National Disaster Resilience Month 2026 ug gipahigayon ubos sa pagpanguna ni CDRRMO Chief Alan Comiso uban ang suporta ni Mayor Warren Pabillaran sa tumong nga mas palig-onon ang kaandam ug kapabilidad sa dakbayan panahon sa dagkong emerhensya ug krisis.
Gisundog sa maong drill ang usa ka peligroso nga senaryo diin lima ka armadong miyembro sa teroristang grupo ang pugsanong misulod sa Malaybalay City Hall. Ang pangunang prayoridad sa maong aktibidad mao ang pagpalambo sa inter-operability ug pagkahiusa sa nagpundok nga mga responders sama sa Philippine National Police (PNP), Armed Forces of the Philippines (AFP), Bureau of Fire Protection (BFP), CHO-HEMS, ug CDRRMO aron masiguro ang paspas ug organisadong pagtubag sa bisan unsang hulga sa seguridad.
Human sa maong pagbansay, nagpahigayon dayon og usa ka feedbacking session ang tanang opisyal aron usisahon ang kalampusan sa pagtubag, susihon ang mga bahin nga kinahanglan pang palamboon, ug mas pahugtan ang koordinasyon sa matag ahensya. Nagpabilin ang pahimangno sa mga awtoridad nga ang pagka-amgohan ug igong pagpangandam mao ang unang linya sa panalipod aron masiguro ang kasegurohan ug kaluwasan sa tibuok komunidad sa Malaybalay.
Photo Courtesy: Malaybalay CPS
