Nabungkag sa mga otoridad ang usa ka drug den sa Purok Centro, Barangay Matiao, Mati City, Davao Oriental pasado alas 12:05 sa kadlawon niadtong Hulyo 31, 2026 atol sa gikasang buy bust operation.
Gihimo ang operasyon sa pagpanguna sa mga operatiba sa Mati City Police Station, sa pakigtambayayong sa PDEA Davao Oriental Provincial Office ug DAVOR MARPSTA, nga miresulta sa pagkasikop sa upat ka drug personalities nga giklasipikar isip High Value Targets (HVTs), lakip ang giila nga drug den maintainer, usa ka den employee, ug duha ka den visitors.
Atol sa buy-bust operation, nakasakmit ang mga otoridad ug gibana banaang kapin 25 gramos sa gituohang shabu nga adunay Standard Drug Price nga mokabat sa Php170,000.00, diin lakip usab sa nakumpiska ang buy-bust item ug uban pang mga drug paraphernalias.
Sa kasamtangan ang mga dinakpan anaa na sa kustodiya sa Mati City Police Station alang sa hustong disposisyon ug nag-atubang og kasong paglapas sa Republic Act No. 9165 kun Comprehensive Dangerous Drugs Act of 2002.
Photo Courtesy: Mati CPS
