Gipasakaan og reklamo sa Tindig Pilipinas si Senador Pia Cayetano sa Senate Ethics Committee tungod sa giingong gi-edit ug makalibog nga bidyo nga gi-upload sa iyang Facebook page, nga matod pa nagpasabot nga ang mga prosecutor sa impeachment trial ni Bise Presidente Sara Duterte nagpatigbabaw sa usa ka “fishing expedition.”
Ang reklamo gisang-at sa ethics committee nga gipangulohan ni Senate President Pro Tempore Vicente Sotto III. Matud sa grupo, ang gi-edit nga bidyo makapahuyang sa kredibilidad sa impeachment proceedings ug nagpatunghag pangutana sa pagsunod ni Cayetano sa iyang etikal, propesyonal ug konstitusyonal nga katungdanan.
Giingon usab sa mga nagreklamo nga wala giapil sa bidyo ang katin-awan ni Akbayan Party-list Rep. Chel Diokno nga ang hangyo sa pagpatawag sa mga rekord pinansyal ni Duterte dili angay ikonsiderar nga “fishing expedition.”
Dugang pa nila, ang giingong tinuyo nga pagtangtang sa legal nga pasabot ni Diokno maoy nakapausab sa kahulogan sa iyang pahayag ug mahimong paglimbong sa publiko. Gipasidan-an usab sa grupo nga kung pasagdan kini sa Senado, mahimong moubos ang pagsalig sa publiko sa pagka-neutral sa mga senador nga nagsilbing hukom sa impeachment trial.
Lakip sa mipirma sa reklamo ang mga representante sa Everywoman, Parents Initiative and Social Awareness Mainstreaming Advocacy, Pandayan Para sa Sosyalistang Pilipinas, ug Student Council Alliance of the Philippines.
Sa pagkakaron, wala pa hinuon, motubag ang habig ni Senador Cayetano sa hangyo alang sa iyang komento.
Photo Courtesy: Senate of the Philippines
