Gilauman nga masugdan sa tuig 2027 ang pagtukod sa usa ka bag-ong TESDA classroom sa Bukidnon Provincial Detention and Rehabilitation Center (PDRC) aron mapalapdan ang mga programa sa edukasyon ug skills training alang sa mga Persons Deprived of Liberty (PDLs).
Sumala ni Jail Warden Nelson Balaba, gisuportahan sa Kapitolyo sa Bukidnon ang maong proyekto ug mibisita na usab ang mga personnel sa Provincial Engineering Office aron sa pag-andam sa plano alang sa bag-ong pasilidad. Wala pa matino ang kantidad sa proyekto tungod kay padayon pa ang paghimo sa engineering plan ug cost estimate.
Matod pa ni Balaba, ang kasamtangang classroom sa PDRC gigamit na sa Alternative Learning System (ALS) sa Department of Education, diin adunay klase alang sa elementarya, junior high school ug senior high school. Tungod niini, gikinahanglan ang laing classroom aron mahimong eksklusibo sa TESDA training.
Dugang pa sa Jail Warden, giplano nga mapalapdan ang mga kursong itanyag sa TESDA, lakip ang dressmaking ug paghimo og mga bag ug rugs. Anaa na usab sa pasilidad ang upat ka makina nga gihatag sa TESDA aron gamiton sa skills training sa mga PDL samtang naghulat sa pagtukod sa bag-ong classroom
Photo Courtesy: Bukidnon PDRC
