Gikumpirma sa Department of Environment and Natural Resources (DENR X) pinaagi sa CENRO Manolo Fortich ang pagkadiskobre sa populasyon sa Rafflesia schadenbergiana sa lasang sa Malitbog, Bukidnon.
Nagsugod ang maong dokumentasyon pinaagi sa taho gikan sa tribong kumunidad sa Higaonon, diin giila sa mga lumad ang maong talagsaong bulak isip “kalo sa kokok”.
Sa gipahigayong inspeksyon ug pagsubay sa DENR taliwala sa Nobyembre 2025 ug Hulyo 2026, nakatala sila og pipila ka nga nagbuka nga bulak—diin ang labing dako moabot sa 63 sentimetros ang kalapad—ubanan sa siyam ka himsog nga mga bukol o buds nga padayong nagtubo.
Tungod kay kini nga matang sa parasitic nga tanom walay gamot o dahon ug nagdepende lang sa bagon nga Tetrastigma, nagkahiusa ang DENR, ang Munisipyo sa Malitbog, ug ang tribung Higaonon aron ideklara ang maong lugar nga usa ka Critical Habitat.
Ipatuman usab sa dapit ang tradisyonal nga praktis sa mga lumad nga “balighof” o pagtaod og pulang pisi aron ipahibalo nga gidili ang pag-distorbo sa lugar. Aron masiguro ang seguridad ug proteksyon sa maong talagsaong bulak, gitago una sa mga awtoridad ang eksaktong lokasyon niini sa lasang
Photo Courtesy: DENR – Northern Mindanao
