Gihingusgan sa Bangko Sentral ng Pilipinas (BSP) nga ang pagtangtang sa pipila ka mga bangko sa bayad sa online fund transfers kabahin sa dugay nang paningkamot aron mapadali ug mapabarato ang digital payments sa nasud.
Sumala ni BSP Deputy Governor Mamerto Tangonan, padayon nga gipalapdan sa BSP ang digital payment system pinaagi sa mga plataporma sama sa PESONet, InstaPay, QR Ph, ug Paleng-QR Ph, nga nagtugot sa mas sayon nga pagpadala ug pagdawat og kuwarta.
Misaka na sa 57.4 porsiyento sa tanang retail payments ang digital transactions niadtong 2024, apan target sa BSP nga moabot kini sa 60 hangtod 70 porsiyento pagsugod sa 2028.
Gituohan sa BSP nga ang pagkunhod o pagtangtang sa transfer fees makadasig sa mas daghang Pilipino ug gagmay’ng negosyo sa paggamit sa digital payments.
Bisan pa niini, giila sa ahensya nga kinahanglan usab nga masiguro ang padayon nga kalig-on sa maong polisiya, ilabi na kay kabahin sa kita sa mga bangko ug e-wallet providers ang transaction fees.
Photo courtesy: Youtube snip
