Nagpadayon ang pagpahigayon og tryouts sa nagkalain-laing siyudad ug lungsod sa Sugbo alang sa umaabot nga Governor’s Cup Basketball Tournament 2026, nga gikatakdang magsugod sa Septyembre.
Lakip sa nakapahigayon na og tryouts ang dakbayan sa Naga, lungsod sa Tuburan ug Dumanjug, samtang ang Tabuelan magpili sa iyang mga manuwaay karong Hulyo 25 ug 26. Ang tournament gi-organisar sa Cebu Provincial Sports Commission (CPSC) ubos sa pagpangulo ni Chairman Dr. Rhoel Dejano, subay sa direktiba ni Governor Pamela Baricuatro aron mapalig-on ang grassroots sports development sa probinsya.
Sumala sa CPSC, ang torneyo karong tuiga alang lamang sa mga under-18 nga mga manuwaay aron mahatagan og mas daghang oportunidad ang mga batan-ong atleta nga ma-recruit sa mga kolehiyo. Ang opisyal nga paglusad sa Governor’s Cup Basketball Tournament 2026 himuon karong adlawa Hulyo 22 sa Cebu Provincial Capitol.
