Misulod pag-usab si kanhi three-division world champion John Riel “Quadro Alas Casimero sa International Boxing Federation (IBF) junior featherweight rankings, diin nahimutang siya sa No. 10 sa Hulyo nga world rankings.
Misaka usab siya sa World Boxing Organization (WBO) rankings ug karon anaa na sa No. 4, human sa duha ka sunod nga kadaugan sa Japan ubos sa Kameda Promotions. Ang iyang labing bag-ong kadaugan mao ang fourth-round knockout batok kang kanhi world champion Luis Nery sa Mexico niadtong Hunyo 6.
Ang 37-anyos nga boksidor gikan sa Merida, Leyte, nagpadayon sa iyang pagbangon human sa pipila ka tuig. Ang iyang pagsaka sa rankings nagpalawig usab sa posibilidad sa dugay nang gihulat nga sangka batok kang undisputed junior featherweight champion Naoya “Monster” Inoue.
Sa pagkakaron, si Casimero adunay professional record nga 36 ka daog (25 pinaagi sa knockout), lima ka kapildihan, ug usa ka draw, ug sa dili madugay ipahibalo ang iyang sunod nga away.
Photo courtesy:Philippine News Agency
