Mokabat sa 619 ka pamilya nga hingpit nga naguba ang mga balay tungod sa Bagyong Tino niadtong Nobyembre 2025 ang nakadawat og ₱10,000 nga pinansyal nga tabang ug 10 ka kilo nga bugas sa payout nga gipahigayon sa Magay Southern Poblacion Gym, San Francisco Camotes kagahapong adlawa, Hulyo 20, 2026.
Ang pag-apod-apod gipangulohan ni Cebu Governor Pamela Baricuatro pinaagi sa Provincial Social Welfare and Development Office (PSWDO), uban sa ubang opisina sa Kapitolyo ug sa pakigtambayayong sa LGU sa San Francisco.
Gawas sa cash assistance, nagtugyan usab ang Provincial Veterinary Office og mga bitamina, antibiotics, ug deworming medicines alang sa mga kahayopan ngadto sa lungsod.
Sa iyang mensahe, giingon ni Gov. Baricuatro nga ang pagserbisyo sa katawhan maoy sentro sa iyang pagpangulo.
Samtang nagpasalamat si Mayor Alfredo A. Arquillano sa tabang sa Kapitolyo, usa sa mga benepisyaryo miingon nga ang ayuda makatabang sa pagpalit og mga materyales aron mahuman ang pag-ayo sa ilang balay.
Photo courtesy: Wikipedia
