Lima ka mga loro sa usa ka wildlife park sa England ang nahimong sikat dili tungod sa ilang kaalam, kondili tungod sa ilang pagkabakakon… este, pagkabastos diay mamulong.
Niadtong 2020, gidonar sa Lincolnshire Wildlife Park ang lima ka African grey parrots nga gidungan og quarantine. Wala madugay, nakamatikod ang mga tig-atiman nga dili ordinaryo ang ilang mga pulong. Kay imbes nga “Hello!” o “Good morning!”, puro pamalikas ang ilang nahibaw-an!
Kung mamalikas ang usa, mokatawa ang usa. Dayon ang mokatawa, mamalikas napud ang laing loro. Murag mga tambay sa eskina nga nagtinubagay og binastos nga mga pulong!
Sa dihang gipakita sila sa publiko, wala pay 20 minutos, namalikas na dayon sa mga bisita. Adunay grupo sa mga kababayen-an nga nagtuo nga adunay empleyado nga nagtago ug nagbugalbugal kanila. Apan ang tinuod? Ang mga loro ra diay ang kusog mangaway!
Tungod niini gikabalak-an nga basin makakat-on usab ang ubang 200 ka mga loro sa zoo, hinungdan nga gibulag sila sa mga tig-atiman. Apan ulahi na ang tanan kay adunay tulo pa ka mga loro ang natakdan sa ilang “bisyo” sa pagpamalikas.
Hangtod karon, usahay kon mosulod ang mga tig-atiman sa ilang hawla, ang ilang madungog nga pag-abiabi kay, “Pahawa diri!”
Moral lesson? Kung mag-atiman kag loro, siguroha nga dili tambay ang iyang mga kauban.
Photo courtesy: Lincolnshire Wildlife Park
