Mikunhod ngadto sa 34% ang trust rating ni Pangulong Ferdinand Marcos Jr., samtang nagpabiling 57% ang trust rating ni Vice President Sara Duterte, sumala sa pinakabag-ong survey sa Social Weather Stations (SWS) nga gihimo sa ikaduhang quarter sa 2026.
Sa resulta sa survey, 34% sa mga Pilipino ang miingon nga dako ang ilang pagsalig kang Marcos, 45% ang adunay gamay nga pagsalig, ug 19% ang wala pa makadesisyon.
Matud pa sa SWS, nagpadayon ang pag-ubos sa trust rating ni Marcos gikan sa 64% niadtong Hulyo 2024. Bisan og misaka kini ngadto sa 48% niadtong Hunyo 2025, misunod usab ang padayon nga pagkunhod hangtod nakaabot sa 34% sa pinakabag-ong survey. Sa laing bahin, nagpabilin sa 57% ang trust rating ni Vice President Sara Duterte. Apan misaka og 5% ang mga miingon nga gamay ang ilang pagsalig kaniya, ngadto sa 27%, samtang 15% ang nagpabiling wala makadesisyon.
Ang survey sa SWS gihimo pinaagi sa face-to-face interviews sa 1,200 ka hamtong nga Pilipino gamit ang structured questionnaire nga adunay mga visual aid. Aduna kini ±3 porsyento nga margin of error alang sa national percentages ug ±6 porsyento alang sa Metro Manila, Balance Luzon, Visayas, ug Mindanao, nga adunay 95% nga confidence level.
Photo courtesy: Presidential Communications Office
