Gipasiugda sa Department of Social Welfare and Development (DSWD) Field Office X, pinaagi sa Disaster Response Management Division (DRMD), ang nagpadayon nilang paningkamot sa pagpalig-on sa pagpangandam ug pagtubag sa mga kalamidad panahon sa Kapihan sa PIA nga gipahigayon sa dakbayan sa Cagayan de Oro.
Atol sa diskusyon, gihatagan og pagtagad sa DSWD Field Office X ang kahinungdanon sa pag-preposition o pag-andam daan sa mga relief resources ug ang pagpalig-on sa koordinasyon sa mga Local Government Unit (LGU) aron masiguro ang paspas nga paghatag og tabang sa mga pamilyang maapektuhan sa kalamidad.
Gihatagan ni Chendy G. Borbano, Section Head sa Disaster Response Information and Management Section (DRIMS), og kabug-aton ang panginahanglan sa padayon nga pagtinabangay kauban ang ubang mga ahensya aron mapalambo pa ang pagtubag ug pagbangon gikan sa kalamidad.
Gihisgotan usab sa Kapihan ang kaimportante sa mga pasidaan sa panahon, storm warning signals, ug ang pagplano nga nakabase sa siyensya alang sa pagpangandam sa kalamidad. Gipadayag sa mga ahensya nga ang sayo nga pagpasidaan, pagtuki sa risgo, partisipasyon sa komunidad, ug ang mga lakang nga daan nang gipangandaman dako og tabang sa pagkunhod sa epekto sa mga peligro sama sa baha, pagdahili sa yuta, linog, ug uban pang emerhensya.
Dugang ni Borbano, nagpabilin ang DSWD X nga masaligon sa paghatag tabang ug paningkamot sa pagpabalik sa kaayohan sa mga pamilya ug komunidad sa Amihanang Mindanao.
Photo courtesy: DSWD Northern Mindanao
