Nakab-ot sa Police Regional Office 10 ang dagkong kalampusan sa kampanya batok sa kriminalidad sa unang unom ka bulan sa 2026, subay sa datus nga gipagula atol sa press conference nga gipahigayon kagahapong adlawa Hulyo 20, sa Camp Alagar sa Cagayan de Oro City.
Matod ni PRO-10 Regional Director PBGEN Christopher N. Abrahano, nakapahigayon ang rehiyon og 1,641 ka anti-illegal drug operations nga misangpot sa pagdakop sa 1,908 ka mga suspetsado ug pagkasakmit sa kapin 20 ka kilo sa shabu ug 3.5 ka kilo sa marijuana nga adunay kinatibuk-ang kantidad nga P137.9 milyon.
Sa kampanya batok sa smuggling, nakapahigayon usab ang PRO-10 og 776 ka operasyon diin nadakpan ang 402 ka indibidwal ug nasakmit ang P119 milyon nga kantidad sa smuggled cigarettes ug P41.1 milyon nga unmarked diesel. Dugang pa, kapin P50 milyon nga smuggled cigarettes ang nasakmit sa mga operasyon gikan Hulyo 9 hangtod 15.
Nakadakop usab ang kapulisan og 1,715 ka wanted persons, lakip ang 320 Most Wanted Persons, nakarekober og 921 ka loose firearms, ug nakaneutralize og 123 ka miyembro sa Communist Terrorist Group. Sa iligal nga pagmina, nakumpiskar usab ang mga kagamitan nga nagkantidad og kapin P81.3 milyon.
Samtang, sumala sa PRO-10, mikunhod og 20.74 porsiyento ang 8 ka focus crimes sa rehiyon ubos sa Safer Cities Initiative, samtang padayon usab ang ilang pagpangandam alang sa seguridad sa umaabot nga State of the Nation Address pinaagi sa pagdeploy og 4,688 ka kapulisan sa tibuok Northern Mindanao.
