Nangayo og ₱2 nga dugang sa minimum fare ang pipila ka transport groups tungod sa padayon nga pagsaka sa presyo sa petrolyo, samtang gikonsiderar usab nila ang pagpahigayon og nationwide transport strike.
Sumala kang MANIBELA chairperson Mar Valbuena, dili na igo ang ₱1 nga fare increase tungod kay wala pa makabawi ang mga drayber ug operators sa ilang mga lugi sukad sa Marso.
Matud niya, mas makatarunganon ang ₱2 nga dugang sa pamasahe, ilabina nga misamot ang pagsaka sa presyo sa gasoline tungod sa tensiyon tali sa United States ug Iran.
Mipahayag usab si ACTO president Libay de Luna nga kinahanglan nang aprobahan ang fare hike aron matabangan ang transport sector.
Matud niya, bisan ₱1 o ₱2 nga dugang sa pamasahe dako nang tabang sa mga drayber ug operators. Posible matud pa ga makadugang kini og ₱150 hangtod ₱200 sa ilang adlaw-adlaw sa mga drayber.
Nagpasidaan usab ang duha ka transport leaders nga posible silang maglunsad og transport strike kon magpadayon ang pagsirit sa presyo sa mga produktong petrolyo.
Sumala ni Valbuena, mokabat sa 100,000 ka drayber ug operators sa tibuok nasud ang posibleng moapil sa strike. Gitakda usab ang panagkita sa MANIBELA ug Land Transportation Franchising and Regulatory Board (LTFRB) karong Hulyo 21 aron hisgutan ang ilang hangyo nga fare hike.
Photo Courtesy:Linkedln
