Giklaro sa General Santos City Police Office (GSCPO) nga ang kadaghanan sa mga ilegal nga droga nga ilang nasakmit dili naggikan sa General Santos City kondili sa mga lugar gawas sa dakbayan.
Kini ang gibutyag ni PLTCOL Josemarie Simanga, Deputy City Director for Operations (DCDO) sa GSCPO, atol sa Usapang Ligtas at Panatag na Gensan – GSCPO Weekly Media Briefing nga gipahigayon sa Pacman Hall niadtong Hulyo 20, 2026.
Sumala ni Simanga, base sa mga pahayag sa mga nadakpan ug sa impormasyon nga nakuha sa ilang intelligence units, ang mga ilegal nga droga kasagarang naggikan sa mga lugar gawas sa General Santos City ug ginadala lamang ngadto sa dakbayan.
Gipasabot usab niya nga tungod sa estratehikong nahimutangan sa General Santos City nga adunay daghang mga agianan sa pagsulod ug paggawas, nagamit kini isip agianan o transit point sa pagbalhin sa mga kontrabando.
Busa, gipadayon sa GSCPO ang pagpalig-on sa intelligence gathering, checkpoint operations, ug anti-illegal drug operations aron mapugngan ang pagsulod sa mga ilegal nga droga ug mapadayon ang kalinaw ug kaluwasan sa dakbayan.
