Giawhag ni Dr. Victoria Gazo, ang Schools Division Superintendent sa DepEd Bukidnon, ang mga ginikanan, magtutudlo, ug tibuok komunidad nga magtinabangay aron mapanalipdan ang mga kabatan-onan batok sa makadaot nga epekto sa pagpanigarilyo.
Ang maong panawagan gihimo aron mas mapalig-on ang proteksyon sa mga kabataan gikan sa mga peligro niini sa sayong pangidaron.
Sa usa ka eklusibong pakighinabi sa Juander Radyo Malaybalay, gipasabot ni Gazo nga nasayran na sa kadaghanan ang dautang epekto sa sigarilyo sa panglawas.
Tungod niini, gihatagan niya og gibug-aton nga angay magsugod ang pag-edukar ug paggiya sa mga kabataan sulod mismo sa panimalay ug ipadayon kini sa sulod sa mga eskwelahan
Dugang pa sa opisyal, pinaagi sa lig-on nga panaghiusa sa eskwelahan ug komunidad, mas mapalapdan pa ang kampanya batok sa pagpanigarilyo.
Kini nga kolaborasyon maoy yawe aron masiguro nga luwas ang kaugmaon ug panglawas sa mga estudyante sa probinsya
Photo Courtesy:Mens Health
