Kritikal ug padayong nakigbisog alang sa iyang kinabuhi ang usa ka hamtong ug baye nga Philippine Eagle human kini naluwas nga luya, dehydrated, dili makalupad, ug puno sa mga ulod ang mga samad niini didto sa daplin sa Sapa sa Sawaga, Barangay Dalwangan niadtong Hulyo 3, 2026.
Gipangalanan karon ang maong agila og “Sawaga-Dalwangan,” nga gipailawom na sa pag-atiman sa mga beterinaryo sa Davao City diin nakitaan usab kini og duha ka bala sa de-bomba (pellets) sa sulod sa iyang lawas ug mga timailhan nga gigapos kini gamit ang rabel.
Tungod sa makapahasol nga kahimtang sa agila, nanawagan karon ang Philippine Eagle Foundation (PEF) ngadto sa Department of Environment and Natural Resources (DENR) nga mangulo sa usa ka pormal nga imbestigasyon uban sa tabang sa kapulisan aron sutaon kon kinsa ang nalambigit sa pagpasipala niini.
Hisayrang naila ang Barangay Dalwangan nga usa sa mga importanteng dapit sa Mount Kitanglad Range Natural Park diin nahimutang ang ikaduhang labing karaan nga permanenteng puy-anan ug dapit-pangitlog sa mga agila sa tibuok kalibotan sukad pa niadtong tuig 1986.
Gisugyot sa mga eksperto nga dako kaayo ang epekto sa mawad-an o madaot nga usa ka hamtong nga baye nga agila tungod kay mas ubos na lang sa 400 ka paresan niini ang nahabilin sa lasang, gawas pa nga molungtad og lima ngadto sa pito ka tuig una sila mahimong hamtong ug makapangitlog lang og kausa matag duha ka tuig.
Bisan pa man sa paspas nga pagtinabangay sa mga molupyo, lumad, lokal nga gobyerno, ug PEF aron madala sa luwas nga pasilidad ang agila, nagpabiling dili pa siguro kon hingpit ba kining maka-rekober gikan sa grabeng kadaot nga naangkon niini.
Photo Courtesy: Philippine Eagle Foundation
