Hinimok ang mga miyembro ng mga partido at koalisyong pampulitika sa Bangsamoro Autonomous Region in Muslim Mindanao o BARMM na magkaisa at suportahan ang kandidatong napagkasunduan ng kanilang grupo para sa susunod na Chief Minister. Sa darating na Oktubre trenta, dos mil bente-sais, boboto ang walumpung miyembro ng Bangsamoro Parliament upang piliin ang bagong mamumuno sa rehiyon. Kailangan ng hindi bababa sa apatnapu’t isang boto upang makuha ang mayorya.
Binigyang-diin ni election lawyer Atty. Romulo Macalintal ang kahalagahan ng katapatan at disiplina sa loob ng isang partido o koalisyon, lalo na sa pagpili ng kanilang susuportahang kandidato. Ayon sa pahayag, inaasahang paninindigan ng bawat miyembro ang napagkasunduan ng kanilang grupo upang mapanatili ang pagkakaisa at matupad ang kanilang mga kasunduang pampulitika.
Posible namang maharap sa aksiyong pandisiplina ang sinumang miyembrong susuway sa napagkasunduang suporta, kabilang ang posibleng pagtanggal sa partido, depende sa mga tuntunin nito at sa umiiral na batas. Sa nalalapit na botohan, masusubok ang pagkakaisa at disiplina ng mga grupong pampulitika sa Bangsamoro. Bawat boto ay mahalaga sa pagpili ng susunod na Chief Minister na mamumuno sa rehiyon.
