Nadakpan sa kapulisan pinaagi sa buy-bust operation ang usa ka 18-anyos nga lalaki sa Barangay Sanito, Ipil, alas 2:30 sa kadlawon sa Hulyo 13, 2026. Ang operasyon gipangulohan sa Station Drug Enforcement Team sa Ipil Municipal Police Station ubos sa pagpangulo ni Police Major Marjan M. Sali.
Narekober sa mga operatiba ang upat ka heat-sealed plastic sachet nga adunay white crystalline substance nga gituohang shabu, nga adunay gibana-banang timbang nga usa ka gramo ug standard drug price nga ₱6,800. Nakuha usab ang usa ka marked ₱500 bill ug usa ka itom nga leather wallet nga gigamit isip ebidensya sa operasyon.
Gihimo ang pagmarka ug imbentaryo sa mga nakumpiskang ebidensya atubangan sa usa ka opisyal sa barangay ug usa ka representante sa media, subay sa mga pamaagi nga gitakda sa balaod. Ang mga ebidensya ipadala sa Zamboanga Sibugay Provincial Forensic Unit alang sa laboratory examination, samtang ang suspetsado gidala sa Ipil Municipal Police Station alang sa hustong disposisyon ug pagpasaka og kaso ubos sa Republic Act 9165 o ang Comprehensive Dangerous Drugs Act of 2002.
Sumala sa kapulisan, kabahin kini sa ilang padayon nga kampanya batok sa illegal nga droga aron mapanalipdan ang komunidad batok sa mga iligal nga substansiya. Giawhag usab ang publiko nga magpadayon sa paghatag og impormasyon sa mga awtoridad aron mapalig-on ang kampanya batok sa kriminalidad ug mapadayon ang kalinaw ug kahapsay sa Zamboanga Sibugay.
