Gipahinumdoman sa tigpamaba sa Senate Impeachment Court nga si Atty. Regie Tongol nga ang tanang senator-judges kinahanglan motuman sa sub judice rule, nga nagdili kanila sa paghimo og publikong pamahayag mahitungod sa merito sa impeachment case aron mapreserbar ang pagka-patas ug pagka-impartial sa pagdungog.
Ang pamahayag gihimo ni Tongol human depensahan ni Senator-judge Robin Padilla ang iyang mga pangutana sa impeachment trial ni Vice President Sara Duterte pinaagi sa usa ka Facebook post, ilabina bahin sa pagka-awtentiko sa video evidence nga gipresentar sa prosekusyon.
Sumala ni Tongol, klaro sa Rule 18 sa Senate Impeachment Rules nga ang senator-judges, House prosecutors, defense counsels ug private counsels dili angay magkomento sa merito sa kaso.
Apan iyang gipatin-aw nga wala siya nagaingon nga nakalapas si Padilla sa maong lagda, tungod kay ang maong pagtimbang mahimong buhaton sa kapwa niya senator-judges o sa presiding officer kon adunay pormal nga reklamo.
Matud pa ni Tongol, ang maong lagda gitakda aron malikayan ang bisan unsang pagduda sa pagpihig ug aron mapadayon ang pagsalig sa publiko sa pagka-patas ug pagka-impartial sa impeachment court.
Photo courtesy: Joseph B. Vidal/ Senate Social Media Unit
