Subling nagpasidaan ang Department of Health o DOH Region 10 sa publiko nga magbantay batok sa Leptospirosis, kasunod sa pagsugod sa ting-ulan ug padayon nga pag-ulan sa nagkadaiyang lugar.
Sumala sa DOH X, ang Leptospirosis usa ka seryosong sakit nga mahimong makuha pinaagi sa pagkontak sa tubig o yuta nga kontaminado sa ihi sa mga hayop, ilabina sa ilaga. Busa, gina-awhag ang tanan nga likayan ang paglusong sa baha. Apan kon dili kini malikayan, kinahanglan magsul-ob og botas o ubang proteksyon aron malikayan ang direktang pagkontak sa kontaminadong tubig.
Gipahinumdoman usab ang publiko nga hugasan dayon ang kamot ug tiil human ma-expose sa baha ug huptang limpyo ang panimalay ug palibot aron dili makapuyo ang mga ilaga.
Samtang, kon makasinati og hilanat, sakit sa kaunoran, labad sa ulo o uban pang sintomas human malusong sa baha, kinahanglan nga magpakonsulta dayon sa labing duol nga health center o ospital aron malikayan ang grabeng komplikasyon sa sakit.
Photo courtesy: DOH X/ Facebook
