Nanguna ang Online Sexual Abuse or Exploitation of Children (OSAEC) sa mga kaso sa human trafficking nga natala sa Northern Mindanao, sumala sa Department of Social Welfare and Development o DSWD Region 10.
Gibutyag ni Social Welfare Officer IV Mark Anthony Viernes nga gikan sa 2024 hangtod karong 2026, nakaatiman ang DSWD X og 232 ka victim-survivors sa human trafficking. Sa maong ihap, 73 porsyento ang biktima sa OSAEC, gisundan sa illegal recruitment nga adunay 10 porsyento ug prostitution nga adunay 4 porsyento.
Tungod niini, gipalig-on sa DSWD X ug sa Regional Inter-Agency Council Against Trafficking and Violence Against Women and their Children o RIACAT-VAWC ang kampanya batok sa human trafficking ug uban pang matang sa pagpahimulos sa mga tawo.
Matud pa ni Viernes, adunay nagkadaiyang programa ang DSWD aron matabangan ang mga biktima sa ilang pagbangon, lakip ang pag-assess sa kahimtang sa ilang pamilya aron mahatagan usab og angay nga suporta ug interbensyon.
Photo courtesy: DSWD/ PIA
