Miangkon ang Roads and Traffic Administration (RTA) sa Cagayan de Oro nga kulang ang ilang mga personahe nga nagpatuman sa kahapsay sa dagan sa trapiko ug pagdisiplina sa mga motorista nga naglapas sa balaod sa kadalanan.
Bisan niini, gipasabot sa tigpamaba sa RTA nga si James Andrade nga adunay mga estratehiya ang ilang buhatan aron mapadayon ang hapsay nga pagdumala sa trapiko bisan limitado ang ilang manpower.
Lakip sa ilang gipatuman ang gitawag nga “Burak System,” ilabina sa Masterson Avenue sa Barangay Carmen, diin sa oras sa buntag ug hapon, ginauna ang pagpaubos sa dagan sa mga sakyanan padulong sa ubos nga bahin sa dalan aron maminusan ang pagsangit sa trapiko gikan sa taas nga bahin.
Padayon usab ang RTA sa pag-awhag sa mga motorista nga motuman sa mga lagda sa trapiko ug makigtinabangay aron mapadayon ang kahapsay sa kadalanan sa dakbayan.
Photo courtesy: Roads and Traffic Administration
