Gitugotan na sa Hong Kong ang mga iro nga makauban sa ilang mga tag-iya sulod sa kapin 900 ka aprubadong kan-anan, human giluagan sa gobyerno ang kapin tulo ka dekadang lagda nga nagdili sa mga binuhi sa mga restawran.
Ang bag-ong polisiya kabahin sa kampanya sa Hong Kong aron mapalambo ang usa ka pet-friendly nga katilingban. Kaniadto, sukad pa sa 1994, guide dogs ug mga iro nga adunay opisyal nga katungdanan lamang ang gitugotan nga mosulod sa mga kan-anan.
Ubos sa bag-ong lagda, kinahanglan nga nakahigot ang iro sa usa ka pisi nga dili molapas og 1.5 meters, dili tugotan nga mosaka sa lamesa ug dili usab mahimong pakan-on gamit ang reusable nga plato o kubyertos sa tawo. Samtang, ang mga iro nga giila nga delikadong breed dili gihapon tugotan.
Gilauman sa ubang mga kan-anan nga motaas ang ilang kita tungod sa maong polisiya, samtang gidasig usab ang mga tag-iya sa mga binuhi nga mahimong responsable aron mapadayon ang kahapsay ug kalimpyo sa mga pampublikong lugar.
Photo courtesy: South China Morning Post
