Napalgan nga anaa na sa sayong yugto sa pagkadugta ang patayng lawas sa usa ka 34-anyos nga lalaki ubos sa gitukod nga tulay sa Pulangi River dapit sa Sitio Mikasili, Barangay Tankulan, Damulog, Bukidnon niadtong Hulyo 9, 2026.
Base sa report sa Bukidnon PPO, usa ka watchman sa UBI Construction ang nakadiskubre sa lawas nga natabunan sa mga sanga sa kahoy, ug dali niya kining gihigtan og pisi sa hawak aron dili mabanlas sa sulog sa suba.
Nasayran nga ang biktima unang gikatahong nawala sukad pa niadtong Hulyo 6 human kini nanagat sa maong suba dapit sa Barangay Minsamongan, lungsod sa Quezon. Tungod sa paspas nga koordinasyon sa MDRRMO Damulog ug MDRRMO Quezon, daling naabisohan ang pamilya sa biktima ug positibo kining giila sa iyang asawa nga miuban sa mga otoridad sa dapit nga nahitaboan.
Ang malampusong pagrekober sa lawas gihimo pinaagi sa hiniusang pwersa sa Damulog MPS, Bureau of Fire Protection (BFP), MDRRMO, ug mga lokal nga opisyal.
Sa pagkakaron, ang patayng lawas opisyal nang gitubyan ngadto sa iyang pamilya ug gidala balik sa Quezon, Bukidnon alang sa saktong disposisyon
Photo Courtesy: Damulog MPS
