Mag-atubang og kasong contempt of court ang kinsamang testigo nga mapakyas o modumili sa pagtambong sa umaabot nga impeachment trial kung ugaling nalutsan na kini og kamandoan o subpoena gikan sa Senate Impeachment Court.
Sumala ni Atty. Reginald Tongol, ang tigpamaba sa maong korte, pinugsanay o “compulsory” ang maong proseso ug walay katungod nga mobalibad ang usa ka tawo kon gimandoan na sa balaod.
Hinuon, gipatin-aw ni Tongol nga adunay pipila ka mga eksepsyon diin mahimo rang dili mosipot ang usa ka testigo bisan pa man og nakadawat kini og subpoena. Lakip sa mga rason nga konsiderahon sa korte mao kon walay labot ang iyang isulti sa maong kaso, kon gipadad-an lang siya aron samokon o i-harass, kon sayop ang pag-isyu sa kamandoan, o kon dili gayod alang kaniya ang maong dokumento.
Sa pagkakaron, gipahinumdoman sa Senate Impeachment Court ang publiko ug ang mga posibleng ipatawag nga mga saksi nga seryosohon ang maong kamandoan aron malikayan ang priso o mga multa nga dala sa silot sa contempt. Padayon usab ang pagpangandam sa maong korte alang sa pormal nga pag-abli sa pagdungog sa kaso.
Photo Courtesy: Senate Impeachment Court
