Giaprubahan sa Department of Agriculture (DA) ang pagpatuman sa mga proyekto sa farm-to-market roads nga nagkantidad og ₱2.06 bilyon, nga pondohan ubos sa Philippine Rural Development Program (PRDP) Scale-Up nga gisuportahan sa World Bank.
Naglangkob ang mga proyekto sa kapin 66 ka kilometro nga mga rural roads ug 310 ka linear meters nga mga taytayan nga makakonektar sa mga komunidad sa mga mag-uuma sa mga probinsya sa Zambales, Oriental Mindoro, Masbate, Samar, Bukidnon, ug North Cotabato.
Matod ni Agriculture Secretary Francisco Tiu Laurel Jr., kabahin kini sa paningkamot sa ahensya aron mapalig-on ang lokal nga agri-food supply chain ug mapakunhod ang taas nga gasto sa transportasyon nga tungod sa kulang nga imprastraktura sa kabanikanhan.
Gihingusgan usab niini nga ang mga taytayan nga giaprubahan maoy usa sa labing importante nga bahin sa programa tungod kay mopuli kini sa mga tabok sa suba nga kasagarang dili maagian o delikado panahon sa bagyo.
Ang PRDP Scale-Up, nga gipondohan sa World Bank, nagtumong sa pagpondo sa dugang pang mga imprastraktura sa agrikultura sama sa mga farm-to-market roads, mga sistema sa irigasyon, ug post-harvest facilities aron mapalig-on ang agricultural value chain sa nasud.
Giawhag usab niya ang mga lokal nga panggamhanan nga magpadayon sa pag-andam og mga proyekto nga makatuman sa mga rekisitos sa World Bank aron mapaspasan ang pag-apruba sa umaabot pang mga programa.
Gilauman sa Department of Agriculture nga mahatag ang nahibiling mga proyekto ubos sa PRDP Scale-Up sa dili pa matapos ang tuig.
Photo courtesy: Philippine News Agency
