Puti nga unggoy, nakit-an sa lasang sa Sultan Kudarat Usa ka talagsaong puti nga unggoy ang nakit-an sa lasang sa Kilangil, Sitio Tudog, Barangay Bugso, Senator Ninoy Aquino, Sultan Kudarat, ug nakadani og atensyon human mikaylap ang video niini sa social media.
Sumala kang Belshazaao Hibaler sa Municipal Tourism Office, ang video gikuha sa usa ka tour guide gikan sa IP community nga si John Danda ug gipasa kaniya isip pagpamatuod sa pagpakita sa maong mananap.
Sa video, makita ang giingong albino nga Philippine long-tailed macaque nga nagtongtong sa usa ka kahoy duol sa pinuy-anan sa pamilya ni Danda.
Matod sa tour guide, kasagaran makita ang unggoy matag buntag sa maong lugar ug dili kini dayon mopahilayo kon adunay tawo nga moduol. Human sa pagviral sa video, daghang netizens ang nagpahayag og interes sa talagsaong mananap.
Giawhag usab ni Danda ang mga nagduhaduha nga mobisita sa lugar aron personal nilang makita ang unggoy. Sa pagkakaron, gilantaw sa mga lokal nga opisyal ang mga lakang aron maprotektahan ang maong unggoy ug ang iyang natural nga puy-anan
Photo Courtesy: Municipal Tourism Office – Sultan Kudarat
