Giimbestigahan karon sa kapulisan sa Incheon, South Korea, ang usa ka pulis nga babaye human aksidente niyang nabanggaan ug naligsan ang usa ka babaye nga iyang gitawag aron tabangan samtang nagtuman sa iyang katungdanan.
Sumala sa mga opisyal sa Incheon Michuhol Police Station, ang pulis nga anaa pa sa 20-anyos nga pangedaron giakusahan og kasong pagpatay tungod sa aksidente sa trapiko.
Gi-dispatch ang maong pulis human makadawat og report nga adunay babaye nga nag-edad og 60-anyos nga natumba sa dalan. Apan sa pag-abot sa lugar alas-12:45 sa kaadlawon niadtong Biyernes, aksidente niya kining naligsan gamit ang iyang patrol car.
Miingon ang pulis nga wala siya makakita sa biktima. Matod sa mga imbestigador, ngitngit ang maong dalan ug nahitabo ang insidente duol sa kurbada paingon sa wala nga bahin sa karsada.
Padayon karon nga gisusi sa mga awtoridad ang CCTV footage ug uban pang ebidensya aron matino kon adunay igo nga basehan sa paghangyo og warrant of arrest batok sa maong pulis. Samtang ang police sergeant nga kauban niya sa patrol car isip pasahero, wala hinuoy atubangon nga silot.
Photo courtesy: The Straits Times
