Duha ka tawo ang namatay ug usa pa ang naangol human miulbo ang pinusilay sulod sa Fairlane Town Center mall sa Dearborn, Michigan sa Estados Unidos, Biyernes sa hapon. Sumala sa kapulisan, nagsugod ang insidente sa panag-away sa duha ka grupo nga nagkaila na daan, ug miresulta kini sa pinusilay. Gipasabot sa pulisya nga dili kini random nga pag-atake.
Sa pag-abot sa mga otoridad, ilang nakita ang tulo ka biktima nga adunay mga samad sa pinusilan. Usa ang gideklarang patay didto mismo sa mall, samtang ang ikaduha namatay sa ospital. Ang ikatulong biktima padayon nga gitambalan. Daghang saksi ang gidala sa estasyon sa pulis aron kuhaan og pahayag.
Matod ni Dearborn Police Chief Issa Shahin, ang mga nalambigit sa insidente mao ang tin-edyer nagpanuigon og kapin kon kulang 20-anyos. Samtang Handguns ang gigamit sa pagpamusil ug gituohang gidala kini sulod sa mall. Wala pa matino sa kapulisan ang motibo sa krimen ug wala pay nadakpan og nagpadayon pa usab ang imbestigasyon. Gihangyo sa pulisya ang publiko nga likayan ang maong lugar hangtod mahuman ang ilang operasyon.
Photo Courtesy: New York Post
