Opisyal nang naputol ang kaminyon ni Jelai Andres sa iyang kanhing bana nga si Jon Gutierrez, sumala sa iyang pinakabag-ong vlog nga gipagawas sa iyang youtube channel.
Sa maong vlog, gipadayag ni Jelai nga aprubado na ang annulment ug giambit niya kini sa iyang mga hinigugma, suod nga higala sa showbiz, ug mga kauban nga content creators. Sa unang bahin sa video, daghang netizens ang nagtuo nga buntis siya tungod sa iyang gipakitang mga papeles apan napamatud-an nga dokumento kini sa annulment nila ni Jon.
Lakip sa nakita sa reaction videos ang iyang best friend nga sila Buboy Villar, mga kauban sa DoLaiNab nga sila Donnalyn Bartolome ug Zeinab Harake, ug kanhing kauban sa showbiz nga si Kokoy de Santos.
Nakita usab sa vlog nga na-emotional si Jelai samtang naa sa usa ka restaurant sa dihang gi-reveal sa iyang igsoon ang balita sa annulment. Usa pa gani sa iyang mga pag-umangkon ang nag joke-joke, “You can have four boyfriends now.”
Matod pa ni Jelai, “Masaya po ako kasi finally, officially nawala na sa mundo ko ’yung kasal. Pinakamahirap na chapter ng buhay ko at sobrang dami kong natutunan.” Dugang pa niya, ang annulment usa ka bahin sa iyang adlaw-adlaw nga pag-ampo.
Nagkaila si Jelai ug Jon niadtong 2015 isip JoLai tandem, nagminyo niadtong Oktubre 6, 2018, nagbulag niadtong 2019, nagkabalik niadtong 2020, ug sa katapusan nagbulag ra gihapon pag-usab tungod sa giingong pagbalik sa isyu sa infidelity.
Photo Courtesy:x.com
