Giklaro sa Cagayan de Oro Water District (COWD) ang tumong sa ilang giproposang pagsaka sa singil sa tubig nga ipasaka pa alang sa pag-aprubar sa Local Water Utilities Administration (LWUA) human sa proseso sa public hearing.
Matud ni COWD General Manager Edna Najeal, ang ilang gisugyot nga water rate increase mokabat og 8.74 pesos kada cubic meter sa unang tuig ug dugang nga 6.12 pesos kada cubic meter sa ikaduhang tuig.
Gipasabot ni Najeal nga bisan misaka na ang presyo sa daghang batakang panginahanglan sama sa kuryente ug petrolyo, nagpabilin nga wala pa usab magtaas ang singil sa tubig sa COWD sulod sa dugayng panahon.
Sumala sa water district, ang giproposang rate adjustment gikinahanglan aron masuportahan ang padayong operasyon sa ahensya, pagmentinar sa mga pasilidad, ug pagpalambo sa kalidad sa serbisyo nga ilang gihatag sa mga konsumidor sa dakbayan.
Lakip usab sa mga plano sa COWD ang pagbaton og kaugalingong water treatment plant aron masiguro ang lig-on ug malungtarong suplay sa limpyo nga tubig alang sa nagkadaghang konsumidor sa Cagayan de Oro City.
Sa pagkakaron, padayon pa ang proseso sa konsultasyon ug paghatag og impormasyon ngadto sa publiko kabahin sa maong giproposang water rate increase.
