Kusganong gihimakak ni Commission on Elections Chairperson George Erwin Garcia ang mga pasangil kaniya kabahin sa giingong nakadawat siya og P10 milyones gikan sa mga kanhi bodyguard ni kanhi Ako Bicol Party-list Rep. Zaldy Co.
Matod pa ni Garcia nga ang mga alegasyon batok kaniya pulos mga bakak ug dili tinuod ingon man wala kuno siyay labot sa mga isyu sa flood control projects. Gani gikwestiyon usab sa opisyal ang dili konkretong mga pamahayag sa mga kanhi marines, diin una nilang giangkon nga upat ka maletang bag ang nahatod, apan sa ulahi giingon nga gagmayng mga bag na lamang ang gihatag.
Kabahin niini, sa gipahigayon nga press conference nga gipangulohan ni kanhi Rep. Mike Defensor, kinsa girekomendar sa Comelec nga pasakaan og kasong indirect bribery ang mga nagpaila nga bagmen ug niingon nga sila ang naghatod og P10 milyones kang Garcia nga gikan sa giingong flood control projects.
Samtang gihimakak usab ni Defensor ang alegasyon kabahin sa mihatag kuno siya sa mga kanhi marines og P5 milyones matag usa aron motestigo batok sa pipila ka mga public officials.
Photo Courtesy: Philippine News Agency
