Nadakpan sa mga personahe sa Philippine Drug Enforcement Agency (PDEA) uban sa Mati City Police Station ang usa ka babayeng durugista atol sa gikasang buy-bust operation sa Purok Bayanihan, Barangay Sainz, Mati City, Davao Oriental niadtong Hunyo 16, 2026.
Sumala sa report, giila ang dinakpan nga si alyas “Jinky,” 45-anyos, nga gikonsidera nga usa ka High-Value Target (HVT) sa kampanya batok sa ilegal nga droga.
Atol sa operasyon napalitan sa poseur buyer ang suspek ug usa ka sachet sa gituohang shabu nga mubalor sa P1,000. Human niini gidakop ang suspetsado ug narekober gikan sa iyang posisyon ang laing lima ka pakete sa shabu nga gibana banaang mutimbang sa 360 gramos ug adunay kinatibuk-ang kantidad nga P2,448,000.00. Lakip sa nasakmit ang nagkadaiyang drug paraphernalia ug ang marked money nga gigamit sa operasyon.
Sa kasamtangan ang akusado anaa na sa kustodiya sa kapulisan alang sa tukmang disposisyon ug mag atubang sa kasong paglapas sa Republic Act 9165 kun Comprehensive Dangerous Drugs Act of 2002.
Photo Courtesy: PDEA XI Davao Oriental
