Gipangulohan sa Department of Labor and Employment (DOLE), ang gipasiugda nga Information and Service Caravan on Child Labor Prevention and Elimination kagahapon, Hunyo 17, 2026, didto sa Kaamulan Folk Arts Theater, Malaybalay City.
Nagpundok sa maong kalihokan, ang nagkadaiyang nasyonal nga ahensya, mga lokal nga kagamhanan (LGU), ug mga organisasyon aron pakunhuran ug hingpit nga wagtangon ang child labor o pagpatrabaho sa mga kabataan sa lalawigan.
Usa sa nag-unang highlight sa maong caravan mao ang seremonyal nga pagpirma sa Pledge of Commitment alang sa Philippine Program Against Child Labor ug sa International Labour Organization (ILO) Convention No. 190.
Pinaagi niini, gipalig-on sa mga stakeholders ang ilang hiniusang responsibilidad sa pagpanalipod sa katungod sa mga bata aron makatagamtam sila og saktong edukasyon ug luwas nga palibot imbis nga mapasubo sa delikado ug mapahimuslanong mga trabaho.
Gawas sa maong kasabutan, gipakita usab sa caravan ang dungan nga pagtunol sa nagkadaiyang serbisyo sosyal ug interbensyon alang sa mga kanhi child laborers ug sa ilang mga pamilya. Kini nga pamaagi sa kagamhanan nagtumong sa pagsumpo sa gamut nga hinungdan sa child labor, sama sa kakabos, aron mapalambo ang kinatibuk-ang kaayohan sa mga bulnerableng sektor
Photo Courtesy: DILG -Bukidnon
