Gibuksan sa kagamhanang lokal sa dakbayan sa Valencia, pinaagi sa Gender and Development (GAD) Office, ang pagsaulog sa Pride Month niadtong Hunyo 16, 2026, didto sa Valencia City Hall Covered Court.
Nagtumong ang maong tinuig nga selebrasyon sa pagpauswag sa katungod ug kahimtang sa LGBTQIA+ community kung asa gisugdan pinaagi sa usa ka madasigong “Zumba at Plaza Rizal” ug gisundan sa usa ka “Grand Pride Parade” nga gisalmotan sa nagkadaiyang departamento sa LGU, mga ahensya sa nasudnong kagamhanan, ug nagkalain-laing sektor sa katilingban.
Gawas sa mga kalingawan ug kultural nga aktibidad sama sa gipaabot nga “Drag Race,” gipunting usab sa kagamhanan ang mas lawom ug developmental nga aspeto alang sa kaayohan sa maong sektor. Nagpahigayon sab ang City Health Office (CHO) og “HIV Awareness Discussion” aron maghatag ug tukmang kahibalo sa panglawas, nga gisundan usab sa usa ka “LGBTQIA+ Self-Defense Skills and Tactical Workshop” aron mapalig-on ang kapasidad ug masiguro ang kaluwasan sa mga partisipante batok sa diskriminasyon ug kapintasan.
Hugot nagpaabot sa iyang suporta si Vice Mayor Galario-Fernandez sa maong kalihukan diin iyang gibug-atan nga ang matag sibilisadong komunidad kinahanglan magbaton og respeto, pagdawat, ug patas nga oportunidad alang sa tanan bisan unsa pa man ang ilang seksuwal nga oryentasyon, gender identity, ug ekspresyon
Photo Courtesy: Valencia City Government
